ಕತ್ತಲು ಕಳಚಿತು

ಬಣ್ಣ ಬಣ್ಣದ
ಭಾವನೆಗಳ ಹೆಕ್ಕಿ
ಪೆನ್ನಿನ ಮುಖಕೆ  ಮೆತ್ತಿ
ಪದ ಪದ  ಸೋಸಿ
ಪತ್ರ ಬರೆದೆ

ಮುದ್ದು ಮುಖ ನೋಡಿ
ಮನಸ್ಸಿನಲ್ಲಿದುದ್ದನ್ನು ಗೀಚಿ
ಇಂಟರನೆಟ್ನಲ್ಲಿ ಇಳಿದು
ಮೇಲ್ ಮಾಡಿದೆ

ಅಂತರಂಗದ ತರಂಗಗಳ
ಅವುಚಿ ಹಲೋ ಎಂದೆ
ಕಿವಿ ಅಗಲಿಸಿ
ಎಲ್ಲ ಕೇಳಿದೆ

ಫೇಸ್ ನೋಡದೆ
ಫೇಸ್ ಬುಕ್ ನಲ್ಲಿ  ಪೋಸ್ಟ್ ಮಾಡಿ
ನಿನ್ನ ಅಂಟಿನ ನಂಟಿನಲಿ
ಡೌನ್ ಲೋಡ್ ಆದೆ

ವೀಡಿಯೋ ಕಾನ್ಪರೆನ್ಸ್ ನಲ್ಲಿ
ಕಣ್ಣಲ್ಲಿ ಕಣ್ಣಿಟ್ಟು
ನಿನ್ನ ಪ್ರೀತಿ ದಡದಲಿ ನಿಂತು
ಮನಬಿಚ್ಚಿ ಮಾತನಾಡಿದೆ

ಒಮ್ಮೆ 
ಮೀಟ್ ಮಾಡೋಣ ಅಂತ
ಮೆಟ್ರೋ ಹತ್ತಿದೆ
ಕತ್ತಲು  ಕಳಚಿತು
ಮಾಗಿ ಕನಸು ಮೈ ಮುರಿಯಿತು .
                                               ಡಾ .ನಾಗೇಂದ್ರ ಮಲ್ಲಾಡಿಹಳ್ಳಿ